**
W7s news,,*গুৱাহাটী, ১০ জুলাই:** অসমৰ সমৃদ্ধ ৰেচম বয়ন ঐতিহ্যক নতুন পৰিচয় দিয়াৰ লক্ষ্যৰে **ৰিদমিক থ্ৰেডছ**-এ ৯ জুলাইৰ দিনা 'ফেশ্যন ডে' উপলক্ষে 'ৱিভ আইকনছ – ফ্ৰম লুম টু লাইমলাইট' শীৰ্ষক এক বিশেষ সাংস্কৃতিক উদ্যোগ ডিজিটেলভাৱে মুকলি কৰে। এই উদ্যোগৰ জৰিয়তে শুৱালকুছিৰ যুৱ ৰেচম শিপিনীসকলৰ অৱদানক স্বীকৃতি আৰু সন্মান জনোৱা হয়।
এই উদ্যোগ 'নৰ্থ ইষ্ট ক্ৰিয়েটিভ এণ্ড কালচাৰেল ফাউণ্ডেশ্যন (NCCEF)' আৰু 'ARVAT JAYA'-ৰ সহযোগত আৰম্ভ কৰা হৈছে। ইয়াৰ মূল উদ্দেশ্য হৈছে অসমৰ বিশ্ববিখ্যাত ৰেচম বয়ন ঐতিহ্য সংৰক্ষণ আৰু আগবঢ়াই নিয়াত যুৱ প্ৰজন্মক উৎসাহিত কৰা।
উদ্যোগটোৰ প্ৰথম সংস্কৰণত শুৱালকুছিৰ ছয়গৰাকী যুৱ শিপিনী—চাৰিগৰাকী মহিলা আৰু দুগৰাকী পুৰুষক এক ব্যতিক্ৰমী ফেশ্যন ৰূপান্তৰৰ বাবে নিৰ্বাচন কৰা হয়। বিশিষ্ট ফেশ্যন ডিজাইনাৰ আৰু চলচ্চিত্ৰ পৰিচালক দীপাংকৰ কাশ্যপে তেওঁলোকৰ সাংস্কৃতিক পৰিচয় আৰু ঐতিহ্য অক্ষুণ্ণ ৰাখি বিশেষভাৱে ষ্টাইলিং কৰে।
এই ফেশ্যন আলোকচিত্ৰসমূহ শুৱালকুছিত 'ৰিদমিক থ্ৰেডছ'-ৰ প্ৰতিষ্ঠাপক তথা আন্তঃৰাষ্ট্ৰীয় খ্যাতিসম্পন্ন ফেশ্যন আলোকচিত্ৰশিল্পী আৰু চলচ্চিত্ৰ নিৰ্মাতা সমসুভ্ৰ চৰকাৰে গ্ৰহণ কৰে। ছবিসমূহত যুৱ শিপিনীসকলক তেওঁলোকৰ পৰম্পৰাগত কৰ্মস্থলী আৰু স্বাভাৱিক পৰিৱেশত উপস্থাপন কৰা হৈছে, যিয়ে অসমৰ শতাব্দীপ্ৰাচীন ৰেচম বয়ন পৰম্পৰাৰ সৈতে তেওঁলোকৰ গভীৰ সম্পৰ্ক ফুটাই তুলিছে।
'ৱিভ আইকনছ'ৰ নিৰ্মাণ প্ৰক্ৰিয়াক লৈ এখন তথ্যচিত্ৰধৰ্মী কেছ ষ্টাডি চলচ্চিত্ৰও প্ৰস্তুত কৰা হৈছে, যি পৰৱৰ্তীকালত মুকলি কৰা হ'ব।
এই সন্দৰ্ভত সমসুভ্ৰ চৰকাৰে কয় যে এই উদ্যোগ অসমৰ ৰেচম ঐতিহ্য জীয়াই ৰখা যুৱ শিপিনীসকলৰ প্ৰতি কৃতজ্ঞতা জনোৱাৰ এক আন্তৰিক প্ৰয়াস। তেওঁ আশা প্ৰকাশ কৰে যে এই পদক্ষেপে অধিক সংখ্যক যুৱক-যুৱতীক নিজৰ সাংস্কৃতিক পৰিচয়ৰ প্ৰতি গৌৰৱবোধ জগাই তুলিব আৰু এই সমৃদ্ধ ঐতিহ্য আগুৱাই নিয়াত অনুপ্ৰাণিত কৰিব।
আয়োজকসকলৰ মতে, 'ৱিভ আইকনছ'ৰ লক্ষ্য হৈছে পৰম্পৰাগত শিপিনীসকলক সাংস্কৃতিক দূত হিচাপে প্ৰতিষ্ঠা কৰা, যাতে ঐতিহ্যবাহী হস্তশিল্পক আধুনিক ফেশ্যন আৰু বিশ্বজনীন কাহিনী কোৱাৰ মাধ্যমত নতুন মাত্ৰা প্ৰদান কৰিব পাৰি। ভৱিষ্যতে এই উদ্যোগ উত্তৰ-পূৰ্বাঞ্চলৰ বিভিন্ন বয়ন সম্প্ৰদায়লৈ সম্প্ৰসাৰণ কৰাৰ পৰিকল্পনা গ্ৰহণ কৰা হৈছে।
No comments:
Post a Comment