আজি মুক্তি পাব কেনি বসুমতাৰীৰ হাস্যৰসপূৰ্ণ ছবি 'কি কোৱা দোস্তি'

 

W7s news,,,,গুৱাহাটী : কেনি দেউৰী বসুমতাৰীৰ নতুন ছবি 'কি কোৱা দোস্তি'য়ে বৃহস্পতিবাৰে বেলতলাৰ মেট্ৰিক্স চিনেমাত বিশেষ প্ৰদৰ্শনী অনুষ্ঠিত হয়। শুকুৰবাৰে সমগ্ৰ অসমত মুক্তি পাবলৈ সাজু হোৱা' 'কি কোৱা দোস্তি' হৈছে ভাড়াঘৰত একেলগে বাস কৰা সাতজন বন্ধুৱে জীৱন বাটৰ উঠা-নমাৰ মাজেৰে আগবাঢ়ি যোৱাৰ এক হৃদয়স্পৰ্শী যাত্ৰা। কাৰোবাৰ প্ৰেমত মচগুল হোৱাৰ পৰা আৰম্ভ কৰি অবাঞ্ছিত অতিথি আৰু অত্যাধিক মানুহৰ সৈতে একেটা কোঠা ভগাই লোৱালৈকে, এজন অত্যাচাৰী ফিটনেছ প্ৰশিক্ষক, সুৰাপায়ী "বন্ধু", চুৰি কৰা বাইক আৰু বহুতো কাহিনীৰে সৈতে চিনেমাখনে জীৱনৰ প্ৰতিটো মুহূৰ্ততে পৰস্পৰৰ প্ৰতি বিশ্বাসী হৈ থকা তিনিজনী ছোৱালী, তিনিজন ল'ৰাৰ লগতে এজন নতুন লৰাৰ এখন জীৱনমুখী যুদ্ধ প্ৰদৰ্শন কৰা হৈছে। চলচ্চিত্ৰখনত চাজু আহমেদ, কৌশিক নাথ, দীপজ্যোতি দত্ত, যতীন দাস, ৰূপশ্ৰী ফুকন, শ্ৰুতি হুছেইন, ৰিমি দেউৰী, অৰ্ঘদীপ বৰুৱা, কাচৱী শৰ্মা আৰু জাভেদ আখটাৰকে ধৰি প্ৰায়ভাগ নতুন মুখৰ শিল্পীয়ে অভিনয় কৰিছে। প্ৰতিগৰাকী অভিনেতা-অভিনেত্ৰীয়ে তেওঁলোকৰ অনন্য প্ৰতিভাক তুলি ধৰি সমূহ দৰ্শকক আমোদ দিব পৰা এক অনন্য প্ৰদৰ্শন আগবঢ়াইছে। কেনিয়ে প্ৰতিটো চৰিত্ৰৰ স্বকীয়তা প্ৰদৰ্শন কৰা আৰু দৰ্শকৰ বাবে এক চিনাকী পৃথিৱী সৃষ্টি কৰাৰ এক অভূতপূৰ্ব কাম কৰিছে।অভিনেতাসকলৰ ভিতৰত, চাজু আহমেদ এগৰাকী প্ৰখ্যাত কৌতুক অভিনেতা, আনহাতে কৌশিক নাথ বৰনদী ভটিয়ায় আৰু লোকেল উৎপাতত প্ৰদৰ্শন কৰা উৎকৃষ্ট অভিনয়ৰ পিছত যথেষ্ট চাহিদাসম্পন্ন অভিনেতা হৈ পৰিছে। দীপজ্যোতি দত্ত আৰু যতীন দাসে কেনিৰ আগৰ চলচ্চিত্ৰসমূহত গুণ্ডাৰ চৰিত্ৰত অভিনয় কৰিছে, কিন্তু বৰ্তমান অতি ভাল অভিনেতা হিচাপে তেওঁলোকে পৰিপক্কতা লাভ কৰাৰ পাছত, তেওঁ এইবাৰ দুয়োকে নায়কৰ চৰিত্ৰত অভিনয়ৰ সুযোগ দিয়ে। আগশাৰীৰ মহিলাসকলৰ ভিতৰত, হেভী বাজেটত কৰা হাস্যকৰ অভিনয়ৰ বাবে অত্যন্ত জনপ্ৰিয় ৰূপশ্ৰী ফুকন, ডাঙৰ পৰ্দাত আত্মপ্ৰকাশ কৰা শ্ৰুতি হুছেইন আৰু নাম্বাৰ ওৱান আণ্ডাৰ-১৮ ডন বঞ্জোৰ ভগ্নী ৰিমি দেউৰী অন্যতম। আন কলাকুশলীসকলৰ ভিতৰত, গায়ক-অভিনেতা অৰ্ঘদীপ বৰুৱা, কাচৱী শৰ্মা (ভাস্কৰ হাজৰিকাৰ কথানদীত তেজীমলাৰ চৰিত্ৰত অভিনয় কৰা অভিনেত্ৰী) আৰু জনপ্ৰিয় ইউটিউব চেনেল এনেই অলপ G3ৰ জাভেদ আখটাৰ অন্তৰ্ভুক্ত হৈ আছে। 

'কি কোৱা দোস্তি'ৰ প্ৰিমিয়াৰত সৃষ্টি হোৱা হাঁহি আৰু উৎসাহজনক পৰিৱেশৰ প্ৰতি লক্ষ্য ৰাখি, চিনেমাখন হিট হ'ব বুলি আশা কৰাটো কোনো আচৰিত কথা নহয়।ইতিমধ্যে লোকেল কুংফু ১ আৰু ২, লোকেল উৎপাত আৰু ছাস্পেণ্ডেড ইন্সপেক্টৰ বড়ো পৰিচালনা কৰা কেনিৰ এক উল্লেখযোগ্য ট্ৰেক ৰেকৰ্ড আছে। তেওঁৰ পূৰ্বৱৰ্তী চলচ্চিত্ৰ ছাস্পেণ্ডেড ইন্সপেক্টৰ বড়োৱে অসম ৰাজ্যিক চলচ্চিত্ৰ বঁটা ২০১৮ত দুটাকৈ বঁটা লাভ কৰিছিল - শ্ৰেষ্ঠ অভিনেতাৰ বাবে উৎকল হাজোৱাৰী আৰু শ্ৰেষ্ঠ সহ-অভিনেত্ৰীৰ বাবে পুনম গুৰুং। 'কি কোৱা দোস্তি'ৰ আঁৰৰ অনুপ্ৰেৰণা সম্পৰ্কে সোধাত কেনিয়ে কয়, "মই সৃষ্টি কৰিব বিচাৰিছিলো ফ্ৰেণ্ডজৰ দৰে কিবা এটা, যাক যিকোনো খণ্ডৰ পৰা আমি যিকোনো সময়তে চাব পাৰোঁ, আমি ভাল পোৱা এখন পৃথিৱী, এটা বন্ধুৰ গোট যিটো আমি সদায়েই বিচাৰি থাকো। আমি 'কি কোৱা দোস্তি'ক এটা শৃংখলা হিচাপে দৃশ্যগ্ৰহণ কৰিছিলো, কিন্তু দৃশ্যগ্ৰহণৰ সময়ত আমি ইমান হাঁহিছিলো যে চিনেমা হলত দৰ্শকৰ সৈতে একেলগে হাঁহিব নোৱাৰিম যেন অনুভৱ হৈছিল। অৱশ্যে মানুহৰ আনন্দময় হাঁহিৰ শব্দ শুনাটোৱেই মোৰ প্ৰিয় অনুভৱ। সেয়েহে, আমি আগবাঢ়ি গৈ ইয়াৰ পৰাই এখন চিনেমা নিৰ্মাণ কৰিলোঁ।"কেনিৰ নিয়মীয়া ফটোগ্ৰাফী পৰিচালক সুৰুজ ডেকাই ব্লেক মেজিক ৬কে প্ৰ' কেমেৰাত ছবিখনৰ দৃশ্যগ্ৰহণ কৰিছে। প্ৰডাকচন ডিজাইনাৰ হিচাপে কাম কৰিছে এমুঠি পুঠি পৰিচালনা কৰা কুলনন্দিনী মহন্তই, আনহাতে লোকেল উৎপাতত নায়িকাৰ চৰিত্ৰত অভিনয় কৰা পুনম গুৰুঙে কষ্টিউম ষ্টাইলিষ্ট হিচাপে কাম কৰিছে। কেনিয়ে কয়, "এয়া প্ৰথমবাৰৰ বাবে আমি এগৰাকী সঠিক প্ৰডাকচন ডিজাইনাৰ লাভ কৰিছোঁ।" "এজন প্ৰডাকচন ডিজাইনাৰে দেৱালৰ ৰঙৰ পৰা ফ্ৰেমত প্ৰদৰ্শিত হোৱা সামগ্ৰীসমূহলৈকে, এখন চলচ্চিত্ৰৰ সামগ্ৰিক দৃশ্যপট ডিজাইন কৰে। সুৰুজ, কুলনন্দিনী আৰু পুনমলৈ ধন্যবাদ, ছবিখনে সঁচাকৈয়ে এক সমৃদ্ধ, জীৱন্ত ৰূপ লাভ কৰিছে।"চলচ্চিত্ৰখনত বিভূতি ভূষণ নাৰায়ণ, ৰুবুল বড়ো, ড০ জয়ন্ত দাস, গায়ত্ৰী শৰ্মা, নিৰুপম ডেকা, য়েচাশ্ৰী ভূঞা, বেদব্ৰথ বৰাহ আৰু কেনি ডিবি ফিল্মছৰ বিভাষ সিনহা, উৎকল হাজোৱাৰী তথা টনি ডিবিকে ধৰি যথেষ্টসংখ্যক অতিথি অভিনেতায়ো অভিনয় কৰিছে। প্ৰতিগৰাকী অভিনেতাই প্ৰশংসনীয় প্ৰদৰ্শনৰ জৰিয়তে কাহিনীটো অধিক গভীৰ আৰু মনোগ্ৰাহী কৰি তুলিছে। ‘কি কোৱা দোস্তি’ দৰ্শকৰ মাজত হাঁহিৰ খোৰাক জগাব পৰা এখন প্ৰতিশ্ৰুতিপূৰ্ণ মনোৰঞ্জনমূলক চলচ্চিত্ৰ। উজ্জ্বল প্ৰতিভাশালী কলাকুশলীৰ এটি দলৰ সৈতে কেনিয়ে এনে এখন পৃথিৱী সৃষ্টি কৰিছে যাক দৰ্শকে ভাল পাব আৰু চৌপাশৰ চিনাকী পৃথিৱীখনৰ সৈতে ৰিজাব পাৰিব।