৩০ অক্টোবৰত চেভ ভৰলু অভিযানৰ প্ৰতিষ্ঠা দিৱস
দিৱসৰ লগত সংগতি ৰাখি ’বজাৰ কৰা মোনা বিতৰণ কাৰ্যসূচী’
W7s news ষ্টাফৰিপোৰ্টাৰ: চেভ ভৰলু অভিযানৰ বিগত বছৰটোৰ কাম- কাজৰ খতিয়ান ল’বলৈ আৰু ভৱিষ্যত কাৰ্যপন্হাৰ বিষয়ে আলোচনা কৰিবলৈ ৩০ অক্টোবৰত মহানগৰীৰ বিষু নিৰ্মলা ভৱনত দিনৰ ১০:৩০ বজাত প্ৰথম প্ৰতিষ্ঠা দিৱস আৰু প্ৰথম সাধাৰণ সভাৰ আয়োজন কৰিছে৷অনুষ্ঠানত প্ৰকৃতিবিদ আৰু হাড়গিলা চৰাইৰ সংৰক্ষণৰ কাৰণে কৰ্মৰত ড° পূৰ্ণিমা দেৱী বৰ্মনে শুভাৰম্ভ কৰাৰ লগতে গুৱাহাটী আৰু ডাউন টাউন বিশ্ববিদ্যালয়ৰ প্ৰাক্তন উপাচাৰ্য ড° অমৰজ্যোতি চৌধুৰীয়ে মুখ্য অতিথিৰ আসন,ডিব্ৰুগড় বিশ্ববিদ্যালয়ৰ প্ৰাক্তন মুৰব্বী অধ্যাপক ড° শীলা বৰাই সন্মানিত অতিথিৰ আসন শুৱনি কৰিব৷-এই মন্তব্য চেভ ভৰলু অভিযানৰ সভাপতি ড° ৰবীন মজুমদাৰৰ৷আজি গুৱাহাটী প্ৰেছ ক্লাবত অনুষ্ঠিত সংবাদ মেলত ডা° ৰবীন মজুমদাৰে পুনৰ কয়-সেই দিনাই অভিযানৰ নতুন প্ৰকল্প ’বজাৰ কৰা মোনা বিতৰণ কাৰ্যসূচী’ শুভাৰম্ভ কৰা হ’ব৷যি হ’ব মোনা ব্যৱহাৰ কৰাৰ নাগৰিকৰ পুৰণি অভ্যাস ওভতাই অনাৰ এক প্ৰয়াস,যাতে প্লাষ্টিক,পলিথিনৰ মোনা ব্যৱহাৰত অভ্যস্ত নাগৰিকে উপলদ্ধি কৰিব পাৰে যে এই মোনাৰ ব্যৱহাৰে পুৱাৰ পৰা সন্ধিয়ালৈ একোখন ঘৰলৈ অনা দহ- বাৰটা প্লাষ্টিকৰ মোনা বন্ধ কৰিব পাৰিলে মহানগৰত কিমান প্লাষ্টিক সামগ্ৰী কমি যাব৷মুমূৰ্ষ ভৰলুক পুনৰুজ্জীৱিতকৰণৰ বাবে জনসাধাৰণৰ মাজত ভৰলুৰ মৃতপ্ৰায় অৱস্হাৰ সৈতে পৰিচয় কৰাই দি ইয়াৰ পুনৰুদ্ধাৰৰ বাবে সজাগতা সৃষ্টি কৰাৰ লক্ষ্যৰে সামাজিকভাৱে সচেতন নাগৰিকৰ দ্বাৰা প্ৰতিষ্ঠিত সংস্হা চেভ ভৰলু অভিযান৷এই সংস্হাটোৱে ২০২১ চনৰ ২৬ ছেপ্টেম্বৰত জোনালীৰ পৰা ভৰলুমুখলৈ সফলতাৰে আয়োজন কৰা চাইকেল ৰেলীৰে আৰম্ভ কৰা জনসজাগতা কাৰ্যসূচীৰ পাছত বিভিন্ন তেনে কাৰ্যসূচী সম্পন্ন কৰি অহা সংস্হাটো ৩০ অক্টোবৰত এবছৰ সম্পূৰ্ণ হ’ব৷সকলো কাৰ্যসূচীয়েই গুৱাহাটীৰ নাগৰিকৰ দৃষ্টি আকৰ্ষণ কৰিবলৈ সক্ষম হোৱাৰ পাছত ২৫ ছেপ্টেম্বৰত একে সময়তে ভৰলু বাহিনীৰ পাৰৰ পাঁচ অঞ্চলত ’ভৰলু পদযাত্ৰা’ অনুষ্ঠিত কৰা হয়৷শেহতীয়াকৈ গুৱাহাটী পৌৰ নিগমৰ সহযোগত ’ক্লীন ভৰলু ড্ৰাইভ’ কাৰ্যসূচীত নাগৰিকৰ স্বতঃস্ফুৰ্ত অংশগ্ৰহণে সংস্হাটোৰ সৌষ্ঠভ বৃদ্ধি কৰে৷সংবাদ মেলত অভিযানৰ উপ-সভাপতি ডা° সীমাৰেখা দেৱী,যুটীয়া সচিব ডা° ৰুবী কটকী,আশীষ দাস,সদস্য দীপক ভাগৱতী,জয়ন্ত গোস্বামী,কৃষেন্দু ৰয়,ধ্ৰুৱজ্যোতি শইকীয়া উপস্হিত থাকে৷
No comments:
Post a Comment