W7s news গুৱাহাটী: গুৱাহাটী শিশু নাট্য বিদ্যালয়ৰ উদ্যোগত আৰু বিষ্ণু নিৰ্মলা ন্যাসৰ সহযোগত উজান বজাৰস্থিত বিষ্ণু নিৰ্মলা ভৱনত যোৱা ২জুলাইৰ পৰা আৰম্ভ হোৱা শিশু নাট কৰ্মশালাৰ কাইলৈ সামৰণি পৰিব৷ এই উপলক্ষে গুৱাহাটী শিশু নাট্য বিদ্যালয়ৰ উদ্যোগত শ্ৰীমন্তশঙ্কৰদেৱৰ কলাক্ষেত্ৰৰ শ্ৰী শ্ৰী মাধৱদেৱ আন্তৰ্জাতিক প্ৰেক্ষাগৃহত ২০আৰু ২১জুলাইত প্ৰতিদিনে সন্ধিয়া ৬.৩০বজাৰ পৰা দুদিনীয়াকৈ আয়োজন কৰা হয় "শিশু নাট্যমেলা "৷
উল্লেখ্য, ২০দিনীয়াকৈ অনুষ্ঠিত হোৱা এই শিশু নাট কৰ্মশালাখনৰ মূল বিষয় আছিল "দেশৰ লগতে অসমৰ স্বাধীনতা সংগ্ৰামৰ শ্বহীদ সকলৰ ত্যাগ,ভূমিকা আৰু অৱদান"৷কৰ্মশালাখনৰ মুখ্য প্ৰশিক্ষক হিচাপে নাট্যকাৰ-পৰিচালক -অভিনেতা মাণিক ৰয়ৰ লগতে প্ৰশিক্ষক হিচাপে আছিল নিলোৎপল মোহন৷ এই কৰ্মশালাত অংশগ্ৰহণ কৰা প্ৰশিক্ষাৰ্থী সকলক প্ৰমাণপত্ৰ দিয়াৰ লগতে কৰ্মশালাৰ অন্তত অংশগ্ৰহণ কৰা শিশুসকলে ২০জুলাইৰ সন্ধিয়া মঞ্চস্থ কৰে "৪৩ ৰ শেষৰজন শ্বহীদ"(মেণ্টৰ-শোভাংগী কেওঁট), "কিতাপৰ সৌন্দৰ্য"(মেণ্টৰ-শশাংক দাস) আৰু মূল হিন্দী গল্পৰ আধাৰত লুইত বৰুৱাৰ নাট্যৰূপ আৰু পৰিচালনাত "ওলট-পালট" শীৰ্ষক চুটি নাট তিনিখন৷আনহাতে ২১ জুলাইৰ সন্ধিয়া শিশুসকলে "অসমীয়া ভাষাৰ সাধক"(মেণ্টৰ-নিশাংকীতা শৰ্মা), "সাজি সাজি শিকোঁ আহা"(মেণ্টৰ-হাছান শ্বাহনৱাজ ইছলাম)আৰু শোভেশ্বৰ দাসৰ ৰচনা, ৰুণুমী দেৱীৰ পৰিচালনা-পৰিকল্পনা তথা অঞ্জন ভূঞাৰ সহযোগী -পৰিচালনাত "স্মাৰ্ট চিটি" শীৰ্ষক তিনিখনকৈ চুটি নাট পৰিৱেশন কৰিব৷
উল্লেখযোগ্য যে এই শিশু নাট্য মেলাৰ "স্মাৰ্ট চিটি" নামৰ নাটখন মঞ্চস্থ কৰাত নতুন দিল্লীৰ সংগীত নাটক অকাডেমীয়ে গুৱাহাটী শিশু নাট্য বিদ্যালয়ক সহযোগিতা আগবঢ়াইছে৷
No comments:
Post a Comment