W7s News ষ্টাফৰিপোৰ্টাৰ: সৰ্বভাৰতীয় পৰ্যায়ৰ ৱিকিউৎস মুদ্ৰণ সংশোধন প্ৰতিযোগিতাত অসমীয়া ভাষাৰ ৱিকিউৎসই বাৰটা ভাষাৰ ভিতৰত দ্বিতীয় স্থান দখল কৰিবলৈ সক্ষম হৈছে৷ আনহাতে মুঠ এশগৰাকী প্ৰতিযোগীয়ে অংশগ্ৰহণ কৰা প্ৰতিযোগিতাখনিত অসমীয়া ৱিকিউৎসৰ প্ৰাণজ্যোতি নাথে ৰাষ্ট্ৰীয় পৰ্যায়ত প্ৰথম স্থান দখল কৰে৷ অসমীয়া ৱিকিউৎসৰ ১৮ গৰাকী সদস্যই এই প্ৰতিযোগিতাত মুঠ ৩৪ খন ন-পুৰণি অসমীয়া গ্ৰন্থৰ ডিজিটেলকৰণৰ কাম হাতত লয় আৰু ২১ খন গ্ৰন্থৰ কাম মাত্ৰ পোন্ধৰ দিনতে সম্পূৰ্ণ কৰে৷ সদস্যসকলে মুঠ ২,২৪৫ টা পৃষ্ঠাৰ সংশোধন আৰু ২,০৪৫ টা বৈধকৰণ সম্পন্ন কৰে৷ এইসমূহ কিতাপৰ ভিতৰত নগাঁৱৰ লেখক কেশৱ বৰাৰ দুখনকৈ গ্ৰন্থ আৰু লেখিকা জোৱলা বৰাৰ শক্তিশালী আত্মজীৱনীখনকে ধৰি মুঠ চাৰিখন গ্ৰন্থ সন্নিৱিষ্ট হৈছে৷ পুৰণি অসমীয়া কপিৰাইট মুক্ত গ্ৰন্থৰ ভিতৰত বেণুধৰ ৰাজখোৱাৰ 'দৰবাৰ' (১৯০২), দুৰ্গেশ্বৰ শৰ্মাৰ 'বালীবধ' (১৯১২), দীননাথ বেজবৰুৱাৰ 'বেজবৰুৱা বংশাৱলী' (১৯২৬) আৰু ছেইক্সপিয়েৰৰ 'কমেডি অৱ এৰৰছ'ৰ অসমীয়া অনুবাদ 'ভ্ৰম-ৰংগ' (১৯৩৭) অন্যতম৷ চলিত বছৰৰ পহিলা মাৰ্চৰ পৰা ১৬ মাৰ্চলৈকে অনুষ্ঠিত হৈছিল এই প্ৰতিযোগিতা। উল্লেখ্য, তিনিশৰো অধিক আপুৰুগীয়া অসমীয়া গ্ৰন্থ আৰু দুইসহস্ৰাধিক লেখাৰ এটা অনলাইন পুথিভঁৰাল হৈছে অসমীয়া ৱিকিউৎস৷ ২০১৩ চনৰ ৪ জানুৱাৰীত উপ-ডমেইন লাভ কৰা অসমীয়া ৱিকিউৎসত একাউণ্ট এটা খুলি যি-কোনো লোকেই ইয়াৰ সদস্য হ'ব পাৰে আৰু অসমীয়া ভাষাক বিশ্বমুখী কৰাত আগভাগ ল'ব পাৰে৷ অসমীয়া ৱিকিউৎসৰ ৱেবছাইট হৈছে-https://as.wikisource.org
No comments:
Post a Comment