কংগ্রেছৰ ৰাষ্ট্রীয় মুখপাত্ৰ তথা ৰাজ্যসভাৰ সাংসদ শক্তিসিন গোহিলৰ সংবাদমেলৰ বক্তব্য

 

W7s News, নিউজ ডেস্ক: পেট্ৰ'ল-ডিজেলৰ লগতে অত্যাৱশ্যকীয় সামগ্ৰীৰ আকাশলঙ্ঘী মূল্যবৃদ্ধিয়ে সেইসকল ৰাইজৰ ওপৰত প্ৰচণ্ড মাধমাৰ সোধাইছে, যিসকল লোকৰ ইতিমধ্যেই পৰিয়ালৰ উপাৰ্জন কমি আহিছে, সংস্থাপন হেৰুওৱাইছে আৰু আৰ্থিক সংকটত ভুগি আছে। 

মোডী চৰকাৰৰ ভুল নীতিৰ বাবেই অৰ্থনৈতিক সংকট আৰু পৰিয়ালৰ উপাৰ্জন কমিছে। চৰকাৰ খনৰ জনবিৰোধী নীতিৰ অত্যাধিক মুদ্ৰাস্ফীতি বাঢ়িছে আৰু দেশৰ সৰ্বাধিক যুৱক যুৱতীয়ে সংস্থাপন হেৰুৱাইছে। 

মুদ্ৰাস্ফীতি, নিবনুৱা সমস্যা, অৰ্থনৈতিক সংকট আৰু কৰোনা মহামাৰীৰ দৰে মোডীয়ে সৃষ্টি কৰা এই দুৰ্যোগৰ কুফল ভুগিবলগীয়া হৈছে দেশৰ ১৪০ কোটি জনতাই। ইন্ধনৰ দৈনিক মূল্যবৃদ্ধিয়ে পৰিয়াল সমূহৰ মাজত যি সমস্যা সৃষ্টি কৰিছে, এই সমস্যাই মানুহৰ জীৱনত জীয়াই থকাৰ প্ৰত্যাহ্বানৰ সৃষ্টি কৰিছে।ডিজেল, ৰাসায়নিক সাৰ, বীজ, কীটানুনাশক দ্ৰব্য, বিজুলী বিল, কৃষি কৰ্মৰ সঁজুলি আদিৰ অত্যাধিক মূল্যবৃদ্ধিৰ ফলত প্ৰতি হেক্টৰ মাটিত খেতিৰ বাবদ খৰছ প্ৰায় ২০,০০০ টকালৈ বৃদ্ধি হৈছে। 

"কোটাক ইনষ্টিটিউচ'নেল চিকউৰীটি ৰিচাৰ্চ"ৰ সমীক্ষা মতে মাৰ্চ,২০২১ ৰ পৰা জুন,২০২১ লৈ ঘৰুৱা দৈনন্দিন প্ৰয়োজনীয় সামগ্ৰীৰ মূল্য ৪২%লৈ বৃদ্ধি হৈছে (মাত্ৰ তিনি মাহত)। দেশৰ বিগত ৭৩ বছৰীয়া ইতিহাসত প্ৰথমবাৰৰ বাবে ৰাসায়নিক সাৰত ৫% GST, কীটানুনাশক দ্ৰব্যত ১৮% কৰ, ট্ৰেক্টৰ আৰু কৃষি সঁজুলিত ১২% কৰ আৰোপ কৰিছে। পেট্ৰ'ল আৰু ডিজেলৰ আকাশলংঘী মূল্য ইতিহাসত প্ৰথমবাৰৰ বাবে দেশৰ চাৰিওখন মেট্ৰ' চহৰ আৰু ২০০ খনতকৈ অধিক চহৰত পেট্ৰ'লৰ মূল্যই ১০০ টকা পাৰ কৰিছে। ১ জানুৱাৰী, ২০২১ ৰ পৰা ১০ জুলাই, ২০২১ ৰ ভিতৰত পেট্ৰ'ল আৰু ডিজেলৰ মূল্য ৭১ বাৰ বৃদ্ধি হৈছে। মোডী চৰকাৰে যোৱা ৭ বছৰৰ ভিতৰত ২৫ লাখ কোটিতকৈ অধিক আবকাৰী শুল্ক সংগ্ৰহ কৰিছে। যোৱা সাত বছৰত পেট্ৰ'লৰ ওপৰত আবকাৰী শুল্ক ২৪৮% আৰু ডিজেলৰ ওপৰত ৮২০% বৃদ্ধি কৰিছে। যোৱা সাত বছৰত প্ৰতি লিটাৰ পেট্ৰ'লত ২৩.৫০ টকা আৰু প্ৰতি লিটাৰ ডিজেলত ২৮.৩৭ টকা আবকাৰী শুল্ক বৃদ্ধি হৈছে।

২০১৪-১৫ ত সৰ্বমুঠ আবকাৰী শুল্ক ৯৯ হাজাৰ কোটিৰ পৰা ২০২০-২১ ত সৰ্বমুঠ আবকাৰী শুল্ক ৪ লাখ ৫৩ হাজাৰ কোটি টকালৈ বৃদ্ধি হৈছে।  প্ৰতি লিটাৰ পেট্ৰ'লত ভাৰত চৰকাৰে ৩২.৯০ টকা সংগ্ৰহ কৰে, য'ত ২০.৫০ টকাই উপকৰ হিচাপে লোৱা হয়। উপকৰ ৰাজ্য চৰকাৰৰ লগত ভাগ কৰা নহয়, যাৰ ফলত ভাৰত চৰকাৰে ৬২% উপকৰ সংগ্ৰহ কৰে আৰু ৰাজ্য চৰকাৰে এটকাও নাপায়। ডিজেলত কেন্দ্ৰ চৰকাৰে প্ৰতি লিটাৰত ৩১.৮০ টকা সংগ্ৰহ কৰে য'ত ২২ টকাই উপকৰ আৰু কেন্দ্ৰ চৰকাৰে ইয়াত ৬৯% সংগ্ৰহ কৰে য'ত ৰাজ্য চৰকাৰক এটকাও নিদিয়ে। নিজৰ নিজৰ ৰাজ্যত দাম কমোৱাৰ বাবে ৰাজ্য সমূহে ভেট (VAT) কমোৱাক লৈ প্ৰায়েই বিতৰ্কৰ অৱৰ্তত। ২০২০-২১ বৰ্ষৰ প্ৰথম ৯ মাহত সকলো ৰাজ্যই মিলি ১.৩৫ লাখ কোটি টকা ভেট (VAT) সংগ্ৰহ কৰে আৰু যিটো সম্পূৰ্ণ বছৰটিত আনুমানিক ১.৮০ লাখ কোটি পৰ্যন্ত হয়। কেন্দ্ৰই সংগ্ৰহ কৰা আবকাৰী শুল্কৰ লগত তুলনা কৰিলে ৪.৫৩ লাখ কোটি টকাৰ মাত্ৰ ৪১% হয়।

 পেট্ৰ'ল আৰু ডিজেলৰ অত্যাধিক আবকাৰী শুল্কৰ বৃদ্ধি অত্যন্ত দুৰ্ভাগ্যজনক, কিয়নো ই মধ্যবিত্ত আৰু নিম্ন উপাৰ্জন কাৰী লোক সকলক প্ৰত্যক্ষ আৰু পৰোক্ষভাৱে আঘাত কৰে। ডিজেলৰ অত্যাধিক মূল্যবৃদ্ধি কৃষক বিৰোধী কিয়নো কৃষক সকলে ডিজেল ব্যৱহাৰ কৰে আৰু ডিজেলৰ মূল্যবৃদ্ধিয়ে তেওঁলোকৰ ওপৰত মোক্ষম আঘাত কৰে। মোডীৰাজত ঘৰুৱা তেল উৎপাদন নিম্নগামী

ইউ পি এ-১ আৰু ইউ পি এ-২ চৰকাৰৰ সময়ৰ ঘৰুৱা খাৰুৱা তেলৰ উৎপাদন ২৩.৪% (আমদানি আৰু ঘৰুৱা খাৰুৱা তেল) ২০১৪ ৰ পৰা ২০২০ চনৰ ভিতৰত ১৫.৮% লৈ নিম্নগামী হৈছে। দৰাচলতে যোৱা ১৮ বছৰৰ ভিতৰত মোডীৰাজত ২০২০ত আটাইতকৈ কম উৎপাদনৰ ৰেকৰ্ড। কথাই প্ৰতি আগৰ চৰকাৰলৈ দোষ ঠেলি দিয়া মোডী চৰকাৰ খনে তেওঁলোকৰ অদক্ষতাক লুকুৱাই ৰাখিব বিচাৰে। তেল আৰু প্ৰাকৃতিক গেছ নিগম (ONGC)ৰ মুঠ ঘৰুৱা তেল উৎপাদনৰ বাবে মূলধন ব্যয় ৬৩% পৰা ৮% নিম্নগামী হৈ ২০২০-২১ বৰ্ষৰ বাৰ্ষিক বাজেট ৩২,৫০১ কোটি টকাৰ পৰা ২০২১-২২বৰ্ষৰ বাৰ্ষিক বাজেট ২৯,৮০০ কোটি টকালৈ কমি আহিছে। ঘৰুৱা উৎপাদনৰ প্ৰতি মোডী চৰকাৰ কিমান উদাসীন, ইয়াতেই বুজিব পাৰি।

ৰাজহুৱা ক্ষেত্ৰৰ তেল আৰু গেছৰ সংস্থা সমূহ ধ্বংস*

চৰকাৰে অ এন জি চিৰ অৰ্থৰ অভাৱ আৰু চৰকাৰে কম বাজেট নিৰ্ধাৰণ কৰাৰ বাবে অ এন জি চি য়ে তেল খনন আৰু উন্নয়নৰ কাম লেহেমীয়া কৰিছে। অ এন জি চিৰ বাৰ্ষিক বিত্তীয় ব্যয় ২০১৪বিত্তীয় বৰ্ষৰ ০.৩৬ কোটিৰ পৰা ২০২০ বিত্তীয় বৰ্ষত ২৮২৪ কোটিলৈ বৃদ্ধি হোৱাত এক বৃহৎ ধাৰৰ বোজা কঢ়িয়াব লগীয়া হৈছে। তৈল খাদৰ খননৰ ব্যয় অ এন জি চিয়ে ২০১৪ বিত্তীয় বৰ্ষৰ ১১,৬৮৭ কোটি টকাৰ পৰা ২০২০বিত্তীয় বৰ্ষত মাত্ৰ ৪৩৩০ কোটি টকালৈ কমাই আনিছে। 

এল পি জি ২০১৪ চনৰ এপ্ৰিল মাহত প্ৰতিটো ৰন্ধন গেছৰ চিলিণ্ডাৰৰ মূল্য ৪১৪ টকা আছিল আৰু এতিয়া ৮৮৩.৫০ টকালৈ বৃদ্ধি হৈছে। যোৱা সাত বছৰত ৰন্ধন গেছৰ মূল্য দুগুণতকৈও বেছি বৃদ্ধি হৈছে। যোৱা ২০২০ৰ নৱেম্বৰ মাহত প্রতিটো চিলিণ্ডাৰৰ মূল্য ৫৯৪ টকা আছিল আৰু আজি ৮৮৩.৫০ টকা হৈছে । যোৱা ৭ মাহত প্ৰতিটো চিলিণ্ডাৰত ২৮৯.৫০ টকাকৈ বৃদ্ধি হৈছে। দেশত সৰ্বমুঠ ২৯ কোটি লোকে LPG ব্যৱহাৰ কৰে। কিমান গৰাকী উজ্বলা গেছ উপভোক্তাই ৮৮৩.৫০ টকাত এটা এল পি জি চিলিণ্ডাৰ কিনিব পাৰে? প্ৰকৃতাৰ্থত ,২০২০ চনত দেশৰ ২৩ কোটি জনতাক পুনৰ দৰিদ্ৰ সীমাৰেখাৰ তললৈ ঠেলি দিয়া হৈছে আৰু ৯৭% লোক দুখীয়া হৈ গৈছে। ২০১৪ চনত যেতিয়া কংগ্রেছে কাৰ্যভাৰ এৰিছিল, তেতিয়ালৈ কংগ্রেছ চৰকাৰখনে দেশৰ জনসাধাৰণক বছৰি ১,৪২,০০০ কোটি টকা ইন্ধনৰ চাবচিডি দিছিল। এইটো অতি গুৰুত্বপূৰ্ণ যে বৰ্তমানৰ চৰকাৰ খনে বুজি উঠা উচিত যে পেট্ৰ'ল, ডিজেল আৰু এল পি জি ৰ মূল্যবৃদ্ধিয়ে কেনেকৈ মানুহৰ ওপৰত মাধমাৰ সোধায়। ২০১১-১২ ত কেঁচা তেল (crude oil)ৰ আন্তৰ্জাতিক বজাৰ মূল্য প্ৰতি বেৰেলত ১১২ ডলাৰলৈ বৃদ্ধি হৈছিল।২০১৪ চনত কংগ্ৰেছ নেতৃত্বাধীন চৰকাৰ খনে কাৰ্য্যভাৰ এৰাৰ সময়ত প্ৰতি বেৰেল কেঁচা তেলৰ আন্তৰ্জাতিক বজাৰ মূল্য ১০৫.৫২ ডলাৰ আছিল আৰু তেতিয়া প্ৰতি লিটাৰ পেট্ৰ'লৰ মূল্য আছিল ৭১.৫১ টকা। আজি ২০২০-২১ত প্ৰতি বেৰেল কেঁচা তেলৰ আন্তৰ্জাতিক বজাৰ মূল্য ৪৪.৮২ ডলাৰ হোৱাৰ পিছতো প্ৰতি লিটাৰ পেট্ৰ'লৰ মূল্য ১০০ টকাতকৈ অধিক হোৱাটো জনসাধাৰণৰ বাবে অত্যন্ত দুৰ্ভাগ্যজনক  ।

পেট্ৰ'ল-ডিজেল আৰু ৰন্ধন গেছৰ অত্যাধিক মূল্যবৃদ্ধি অত্যন্ত দুৰ্ভাগ্যজনক।