*
গুৱাহাটী, বৰপেটা আৰু ৰঙিয়াত যুৱ নেতৃত্ব বিকাশ আৰু সমাজসেৱাৰ ওপৰত গুৰুত্ব
*W7s news,,গুৱাহাটী, ১০ ছেপ্টেম্বৰ:* জেচিআই ইণ্ডিয়াৰ ৰাষ্ট্ৰীয় সভাপতি জেচি ভাৰত এন আচাৰ্যই জেচিআই ইণ্ডিয়া জ’ন ২৫ ভ্ৰমণ কৰি গুৱাহাটী, বৰপেটা আৰু ৰঙিয়াত বিভিন্ন কাৰ্যসূচীত অংশগ্ৰহণ কৰে। ৰাষ্ট্ৰীয় সভাপতিগৰাকীৰ এই ভ্ৰমণে জেচিআই ইণ্ডিয়াৰ ৰাষ্ট্ৰীয় নেতৃত্ব আৰু তৃণমূল পৰ্যায়ত কাম কৰি থকা যুৱ নেতৃত্বৰ মাজৰ সংযোগ অধিক সুদৃঢ় কৰাৰ ক্ষেত্ৰত বিশেষ তাৎপৰ্য বহন কৰে।
ভ্ৰমণকালত ৰাষ্ট্ৰীয় সভাপতিগৰাকীয়ে জেচি সদস্য, বিষয়ববীয়া আৰু সমাজৰ বিভিন্ন ক্ষেত্ৰৰ সৈতে জড়িত ব্যক্তিসকলৰ সৈতে মত বিনিময় কৰে। তেওঁ নেতৃত্ব বিকাশ, উদ্যোগিতা, সমাজসেৱা আৰু যুৱ সবলীকৰণৰ ক্ষেত্ৰত জ’ন ২৫-এ গ্ৰহণ কৰি অহা বিভিন্ন পদক্ষেপৰ শলাগ লয়।
জ’ন সভাপতি জেচি সুমিত পোদ্দাৰৰ নেতৃত্বত জেচিআই ইণ্ডিয়া জ’ন ২৫-এ যুৱ প্ৰজন্মক নেতৃত্বৰ গুণ বিকাশ, নতুন জ্ঞান আহৰণ আৰু সমাজসেৱাৰ সৈতে জড়িত হোৱাৰ সুযোগ প্ৰদান কৰি আহিছে। জ’নটোৰ কাৰ্যসূচীসমূহ সাংগঠনিক কাম-কাজতে সীমাবদ্ধ নথৈ সমাজত ইতিবাচক আৰু দৃশ্যমান প্ৰভাৱ সৃষ্টি কৰাৰ ওপৰতো গুৰুত্ব আৰোপ কৰা হৈছে।
গুৱাহাটী, বৰপেটা আৰু ৰঙিয়াত ৰাষ্ট্ৰীয় সভাপতিগৰাকীৰ উপস্থিতিয়ে জ’ন ২৫ৰ বিস্তৃত কাৰ্যকলাপ আৰু অঞ্চলটোৰ বিভিন্ন প্ৰান্তত যুৱ নেতৃত্ব বিকাশ তথা সমাজ উন্নয়নৰ কাম আগুৱাই নিয়াৰ প্ৰতি থকা অংগীকাৰক অধিক শক্তিশালী কৰে।
এই উপলক্ষে জ’ন সভাপতি জেচি সুমিত পোদ্দাৰে কয়, “ৰাষ্ট্ৰীয় সভাপতিগৰাকীৰ ভ্ৰমণ জ’ন ২৫ৰ প্ৰতিগৰাকী জেচি সদস্যৰ বাবে এক বৃহৎ উৎসাহ আৰু প্ৰেৰণাৰ উৎস। আমি এনে যুৱ নেতৃত্ব গঢ়ি তোলাৰ বাবে প্ৰতিশ্ৰুতিবদ্ধ, যিসকলে কেৱল নিজৰ পেছাগত ক্ষেত্ৰতে সফলতা অৰ্জন নকৰে, বৰঞ্চ এখন অধিক শক্তিশালী আৰু সবল সমাজ গঢ়ি তোলাৰ বাবেও দায়িত্ব গ্ৰহণ কৰে।”
ৰাষ্ট্ৰীয় সভাপতিগৰাকীৰ এই ভ্ৰমণে জ’ন ২৫ৰ সদস্যসকলৰ মাজত নতুন উদ্যম আৰু উৎসাহৰ সৃষ্টি কৰে। ভ্ৰমণৰ জৰিয়তে যুৱ নেতৃত্ব বিকাশ, সমাজসেৱা আৰু সামাজিক দায়বদ্ধতাৰ ক্ষেত্ৰত জ’ন ২৫ৰ অংগীকাৰ অধিক সুদৃঢ় হোৱাৰ লগতে ৰাষ্ট্ৰ নিৰ্মাণত যুৱ সমাজৰ ভূমিকা অধিক শক্তিশালী কৰাৰ বাৰ্তাও প্ৰতিফলিত হয়।
No comments:
Post a Comment