গুৱাহাটী:
অসমীয়াৰ প্ৰাণৰ উৎসৱ ৰঙালী বিহুলৈ মাজত মাত্ৰ কেইটামান দিন বাকী। ৰাজ্যৰ ভিন্ন প্ৰান্তৰ লগতে গুৱাহাটী মহানগৰীটো বিহুৰ প্ৰস্তুতি তুংগত উঠিছে। দেওবাৰে মহানগৰীৰ অন্যতম ঐতিহ্যবাহী বিহু সন্মিলনী **'মধ্য-পূৱ গুৱাহাটী বিহু সন্মিলনী'**ৰ ৪৮ সংখ্যক বৰ্ষৰ মাংগলিক লাইখুটা স্থাপন অনুষ্ঠান সম্পন্ন হয়।
শিলপুখুৰীৰ শ্ৰীশ্ৰী নৱগ্ৰহ শ্মশান কালী মন্দিৰ খেলপথাৰত অনুষ্ঠিত এই পবিত্ৰ অনুষ্ঠানত লাইখুটা স্থাপন কৰে বিশিষ্ট সমাজকৰ্মী শ্ৰীযুত কামিনী মোহন শৰ্মাই। অনুষ্ঠানত উপস্থিত থাকি বিহু সন্মিলনীৰ প্ৰতি শুভেচ্ছা জ্ঞাপন কৰে প্ৰাক্তন বিধায়ক সিদ্ধাৰ্থ ভট্টাচাৰ্যই।
ৰাজনৈতিক সৌজন্যবোধৰ অনন্য দৃশ্য:
বিহুৰ এই প্ৰস্তুতি পৰ্বত এক বিশেষ মাত্ৰা প্ৰদান কৰে নিউ গুৱাহাটী সমষ্টিৰ নিৰ্বাচনী প্ৰাৰ্থীসকলৰ উপস্থিতিয়ে। লাইখুটা স্থাপনৰ পূৰ্বমুহূৰ্তত বিহু উদযাপন সমিতিৰ বিষয়ববীয়াসকলৰ সৈতে মত-বিনিময় কৰে নিউ গুৱাহাটী সমষ্টিৰ বিজেপি মনোনীত প্ৰাৰ্থী দীপলুৰঞ্জন শৰ্মা আৰু কংগ্ৰেছ মনোনীত প্ৰাৰ্থী তথা প্ৰাক্তন মন্ত্ৰী পংকজ বৰাৰ পুত্ৰ শান্তনু বৰাই। নিৰ্বাচনী যুঁজৰ মাজতো বিহুৰ বাকৰিত দুই প্ৰাৰ্থীৰ উপস্থিতিয়ে এক সুন্দৰ সামাজিক তথা ৰাজনৈতিক সৌজন্যবোধৰ নিদৰ্শন দাঙি ধৰে।
তিনিদিনীয়াকৈ বৰ্ণাঢ্য কাৰ্যসূচী:
বিহু উদযাপন সমিতিৰ সভাপতি জ্যোতিৰ্ময় ৰাখাল গোস্বামী আৰু সাধাৰণ সম্পাদক নিপু দত্তই জনোৱা মতে, এইবেলি ৪৮ সংখ্যক বৰ্ষৰ এই বিহু সন্মিলনীখন তিনিদিনীয়া বৰ্ণাঢ্য কাৰ্যসূচীৰে উদযাপন কৰা হ’ব। সাংস্কৃতিক সন্ধিয়াত অসমৰ জনপ্ৰিয় কণ্ঠশিল্পীসকলে গীত পৰিৱেশন কৰাৰ লগতে দিনৰ ভাগত বিভিন্ন থলুৱা খেল-ধেমালি আৰু প্ৰতিযোগিতা অনুষ্ঠিত হ’ব।
লাইখুটা স্থাপন অনুষ্ঠানত বিহু সমিতিৰ প্ৰচাৰ সম্পাদক বিপুল মজুমদাৰৰ লগতে অঞ্চলটোৰ বহু বিশিষ্ট ব্যক্তি আৰু স্থানীয় ৰাইজে অংশগ্ৰহণ কৰে। অসমীয়া জাতীয় সংস্কৃতিৰ প্ৰসাৰ আৰু ঐক্যৰ বাৰ্তা লৈ সন্মিলনীখনে এইবেলিও এক সফল অনুষ্ঠান উপহাৰ দিব বুলি উদ্যোক্তাসকলে আশা প্ৰকাশ কৰিছে।
No comments:
Post a Comment