কথক নৃত্যাংগনা, অভিনেত্ৰী বি পাল্কীৰ কৃতিত্ব

 

W7s news,,গুৱাহাটী, ২১ আগষ্টঃ কথক নৃত্যাংগনা, অভিনেত্ৰী বি পাল্কীয়ে গুৱাহাটী দূৰদৰ্শন কেন্দ্ৰই ঘোষণা কৰা অডিচনৰ ফলাফল অনুসৰি কথক নৃত্যত দ্বিতীয় স্থান লাভ কৰি দূৰদৰ্শনৰ বি গ্ৰেড শিল্পীৰূপে স্বীকৃতি লাভ কৰিছে ৷ উল্লেখযোগ্য যে 'সুৰ সংগম'ত গুৰু মৰমী মেধি আৰু গুৰু মেঘৰঞ্জনী মেধিৰ তত্ত্বাৱধানত প্ৰশিক্ষণ গ্ৰহণ কৰা পাল্কীয়ে ইতিমধ্যে কথক নৃত্যত ভাটখাণ্ডে সংগীত বিদ্যাপীঠৰপৰা ডিষ্টিংচনসহ নিপুণত উত্তীৰ্ণ হৈছে ৷ চি চি আৰ টিৰ বৃত্তিধাৰী পাল্কীয়ে চি চি আৰ টি (ৰিন্যুৱেল)ত দেশৰ ভিতৰতে শীৰ্ষস্থান দখল কৰিছিল ৷ চি চি আৰ টি উত্তৰ-পূব কেন্দ্ৰত অনুষ্ঠিত 'টিচাৰ্ছ অ'ৰিয়েণ্টেচন প্ৰগ্ৰেম'ত এগৰাকী ডেমনষ্ট্ৰেটৰ হিচাপেও তেওঁ সমাদৃত হৈছে ৷

'অভিনয়া'ত অভিনয়ৰ আদিপাঠ গ্ৰহণ কৰা বি পাল্কীয়ে আকাশবাণী গুৱাহাটী কেন্দ্ৰৰ স্বীকৃতিপ্ৰাপ্ত শিশু শিল্পীৰূপে অনাতাঁৰ নাটত অভিনয় কৰিছে ৷ অভিনয়াৰ উপৰি ছিগাল থিয়েটাৰৰ বেনাৰতো 'শ্লীপি', 'কালাৰ ভিজন' , 'দ্য লেছন' 'অনুজ্ঞাপত্ৰ' আদি কেইবাখনো নাটত মুখ্য চৰিত্ৰত অভিনয় কৰি দৰ্শকৰ ভূয়সী সমাদৰ লাভ কৰিছে ৷ শেহতীয়াকৈ যোৱা ১৭ আগষ্টত পাল্কীয়ে নিজৰ প্ৰযোজনা সংস্থা 'আৰ্য্যা'ৰ বেনাৰত মঞ্চস্থ কৰা  'পকৱান’ নাটৰ জৰিয়তে নাট পৰিচালকৰূপে আত্মপ্ৰকাশ কৰে ৷ নাটখনৰ অৱধাৰণা (concept) আৰু স্ক্ৰিপ্ট পাল্কীৰ নিজৰ ৷ পূৰ্ণ প্ৰেক্ষাগৃহৰে মঞ্চস্থ কৰা নাটখনৰ একমাত্ৰ চৰিত্ৰটোতো পাল্কীয়েই অভিনয় কৰি বিশিষ্ট নাট পৰিচালক, অভিনেত্ৰী পাকিজা বেগম, বিশিষ্ট অভিনেতা কমললোচন, বিশিষ্ট চলচ্চিত্ৰ পৰিচালক অমৰদীপ গগৈ আদিৰদ্বাৰা প্ৰশংসিত হৈছে ৷