,
W7s news,,গুৱাহাটী, ২৩ মাৰ্চ** – ছিগাল থিয়েটাৰত আজি মঞ্চস্থ হোৱা বহুপ্ৰতীক্ষিত নাটক *কালাৰ ভিজন*-এ দৰ্শকক এক গভীৰ মানসিক অভিজ্ঞতাৰ মাজেৰে লৈ যায়। ছিগাল থিয়েটাৰ প্ৰযোজিত নাটখন বিশিষ্ট নাট্যব্যক্তিত্ত্ব বাহাৰুল ইছলামৰ তত্ত্বাৱধানত পৰিচালনা কৰিছে প্ৰণৱজ্যোতি বৰুৱাই ৷ নাটকখনৰ কাহিনী চিত্ৰশিল্পী অভিৰ মানসিক সংঘাত আৰু বাস্তৱ-অবাস্তৱৰ দ্বন্দ্বৰ ওপৰত আধাৰিত। পত্নী নিশাক আন এগৰাকী ব্যক্তিৰ সৈতে দেখি অভিয়ে প্ৰচণ্ড ৰোষত সেই ব্যক্তিজনক হত্যা কৰে। কিন্তু পৰৱৰ্তী সময়ত সত্য উদ্ঘাটিত হয় যে তেওঁ হত্যা কৰা ব্যক্তি এজন মানুহ নহয়, এটি চিত্ৰহে। এই আৱিষ্কাৰে অভিৰ মানসিক অৱস্থাক অধিক সংকটত পেলায়, যাৰ ফলত তেওঁ ৰঙা ৰঙৰ প্ৰতি গভীৰ আতংক অনুভৱ কৰিবলৈ ধৰে।
ৰঙা ৰং নাটকৰ মূল প্ৰতীক হিচাপে উপস্থাপন কৰা হৈছে, যিয়ে অভিৰ অন্তৰৰ উদ্বেগ, অপূৰ্ণ আকাংক্ষা আৰু অস্থিৰতাক প্ৰতিনিধিত্ব কৰে। বি. পালকীয়ে ৰঙা ৰঙৰ চৰিত্ৰত অভিনয় কৰিছে, যি অভিৰ মানসিক অৱস্থাৰ গভীৰ দিশ উন্মোচন কৰে। অন্যফালে, ৰাকিবুল আহমেদ আৰু এলিনা বড়োৱে চিত্ৰৰূপী চৰিত্ৰ নিৰ্মাণ কৰিছে, যি বস্তুবাদ আৰু আধুনিক প্ৰযুক্তিৰ প্ৰভাৱক চিহ্নিত কৰিছে। পুলিচৰ উপস্থিতিৰে নাটকৰ পৰিৱেশক অধিক ৰহস্যময় কৰি তোলে, য'ত আৰবাব ওমৰ আৰু পবন সিদ্ধাৰ্থই পুলিচৰ চৰিত্ৰত অভিনয় কৰিছে।
সিদ্ধাৰ্থ দত্তই অভিৰ চৰিত্ৰত নাটকৰ সংবেদনশীলতাক অধিক প্ৰবল কৰি তুলিছে। মনময়ূৰী বৰ্মণে নিশাৰ ভূমিকাত অভিনয় কৰি কাহিনীৰ মানৱীয় দিশটোক প্ৰকট কৰি তুলিছে। সংগীত পৰিচালনাত ত্ৰিবেণী মহন্তই নাটকৰ দৃশ্যৰ সংবেদনশীলতাৰ সৈতে সংগতি ৰাখি এক সুৰীয়া পৰিৱেশ সৃষ্টি কৰিছে। নাটখনত আলোকসম্পাতেৰে কাহিনীক গতিময়তা প্ৰদান কৰিছে পৰিচালক প্ৰণৱ জ্যোতি বৰুৱাই ৷
নাটকখনে সমাজত চলি থকা ব্যক্তি-মনস্তত্ত্ব, আত্মদ্বন্দ্ব আৰু বাস্তৱ-অবাস্তৱৰ সীমাৰেখাৰ এক গভীৰ অন্বেষণ আগবঢ়াই দৰ্শকক নতুন ধাৰণাৰ সন্ধান দিয়াৰ প্ৰয়াস কৰিছে।
No comments:
Post a Comment