W7s news,,কোকৰাঝাৰ, ২৫ জানুৱাৰী । আজি বডোলেণ্ড টেৰিটৰিয়েল কাউন্সিলৰ সচিবালয়ত বিটিচিৰ মুৰব্বী প্ৰমোদ বড়োৱে ই-অফিচ মেনেজমেণ্ট ব্যৱস্থাটো আৰম্ভ কৰি অসম চৰকাৰৰ পিছত এই ব্যৱস্থা গ্ৰহণ কৰা প্ৰথমখন ষষ্ঠ অনুসূচী পৰিষদ হিচাপে পৰিগণিত হয়। বড়োৱে কাৰ্যসূচী ৰূপায়ণ কৰাৰ সময়ত উল্লেখ কৰে যে ই-অফিচৰ কাঠামোৱে কেৱল উন্নয়ন ক্ষিপ্ৰ কৰাই নহয়, বিষয়াসকলৰ মাজত দক্ষতাও নিশ্চিত কৰিব। তেওঁ উল্লেখ কৰে যে ই-অফিচে বডোলেণ্ড টেৰিটৰিয়েল ৰিজন (বিটিআৰ)ৰ পাঁচখন জিলাত বাস কৰা প্ৰায় পঁয়ত্ৰিশ লাখ নাগৰিকৰ সুবিধাৰ বাবে স্মাৰ্ট গভৰ্নেন্সৰ নতুন যুগৰ পথ প্ৰশস্ত কৰিছে। বড়োৱে বিটিআৰৰ জনসাধাৰণৰ আকাংক্ষাক সম্বোধন কৰিবলৈ সক্ষমক হিচাপে নতুন শাসন ব্যৱস্থা গ্ৰহণৰ গুৰুত্বৰ কথাও উল্লেখ কৰে।
বডোলেণ্ড টেৰিটৰিয়েল কাউন্সিলৰ সকলো বিষয়াক নিৰ্দিষ্ট ব্যক্তিগত লগইন পৰিচয় আৰু ডিজিটেল স্বাক্ষৰ প্ৰদান কৰা হৈছে আৰু বিটিচি সচিবালয়ৰ ৫৫টা (পঞ্চাশটা) বিভাগ, শাখা, আৰু কোষৰ পৰা ৬৫০০০ (পয়ষষ্ঠি হাজাৰ)তকৈ অধিক ফাইল ডিজিটেলাইজ কৰা হৈছে। ই-কাৰ্যালয় পৰিচালনাৰ প্ৰক্ৰিয়া সুশৃংখলিত কৰিবলৈ মুখ্য কাৰ্যবাহী সদস্য, কাৰ্যবাহী সদস্য, বিটিচি বিধানসভাৰ অধ্যক্ষ, আৰু বিষয়াকে ধৰি সকলোৰে বাবে ব্যক্তিগত তথ্য ব্যৱস্থাপনা ব্যৱস্থা (পিআইএমএছ) তথ্য প্ৰস্তুত কৰা হৈছে।
বিটিচিৰ যুটীয়া সচিব ভাস্কৰজ্যোতি ৰাজবংশীয়ে উল্লেখ কৰে যে ই-গভৰ্নেন্সৰ নতুন চাহিদা পূৰণৰ বাবে আই টি আন্তঃগাঁথনি উন্নীতকৰণ কৰা হৈছে আৰু বিটিচিৰ বাবে পৃথক ই-অফিচ চফটৱেৰ সৃষ্টিৰ কাম ২০২৩ চনৰ ১৬ ডিচেম্বৰত আৰম্ভ কৰি নিয়োগ কৰা হৈছে।তেওঁ লগতে উল্লেখ কৰে যে লে আউট ভাৰত চৰকাৰৰ ইলেক্ট্ৰনিকছ আৰু তথ্য প্ৰযুক্তি মন্ত্ৰালয়ৰ সহযোগী কোম্পানী এনআইচিএছআইৰ জৰিয়তে বিটিচি সচিবালয়ত স্থানীয় এলেকা নেটৱৰ্ক (লেন)ৰ কাম সম্পন্ন কৰা হৈছিল।
বিটিচি সচিবালয়ত স্থাপন কৰা ই-লেবত ৰোল আউট টিম আৰু মাষ্টাৰ ট্ৰেইনাৰৰ দ্বাৰা হাতে কামে প্ৰশিক্ষণ দিয়া হয়। ফাইলসমূহ বৈজ্ঞানিকভাৱে সংৰক্ষণ কৰিবলৈ এটা অত্যাধুনিক ৰেকৰ্ড ৰুমও নিৰ্মাণ কৰা হৈছে। বিটিচি সচিবালয়ৰ কৰ্মচাৰীৰ পৰা ৮ (আঠ) জনীয়া মাষ্টাৰ ট্ৰেইনাৰৰ এটা দল বাছনি কৰি দিছপুৰত থকা অসম সচিবালয় (চিভিল)ৰ ই-অফিচৰ দলে প্ৰশিক্ষিত কৰি কাৰ্যকৰীকৰণৰ প্ৰাৰম্ভিক পৰ্যায়ত প্ৰক্ৰিয়াটো নিৰীক্ষণ কৰে।
ই-অফিচ হৈছে চৰকাৰৰ ৰাষ্ট্ৰীয় ই-গভৰ্নেন্স প্ৰগ্ৰেমৰ অধীনত এক মিছন মোড প্ৰজেক্ট (এম এম পি)। ৰাষ্ট্ৰীয় তথ্যবিজ্ঞান কেন্দ্ৰই (এন আই চি) এই প্ৰডাক্টটো বিকশিত কৰিছে আৰু ইয়াৰ লক্ষ্য হৈছে অধিক কাৰ্যক্ষম, ফলপ্ৰসূ আৰু স্বচ্ছ আন্তঃচৰকাৰী আৰু চৰকাৰী আভ্যন্তৰীণ লেনদেন আৰু প্ৰক্ৰিয়াৰ সূচনা কৰা।
No comments:
Post a Comment