মুখ্যমন্ত্ৰী ড০ হিমন্ত বিশ্ব শৰ্মা, কেন্দ্ৰীয় মন্ত্ৰী পুৰুষোত্তম ৰূপালা, ৰাজ্যিক মন্ত্ৰী অতুল বৰাৰ উপস্থিতিত বুজাবুজিচুক্তি স্বাক্ষৰিত
W7s News ষ্টাফৰিপোর্টাৰ: দুগ্ধ পালনৰ জৰিয়তে অসমৰ গ্ৰাম্য দৃশ্যপট পৰিৱৰ্তনৰ লক্ষ্যৰে অসম চৰকাৰ আৰু ৰাষ্ট্ৰীয় দুগ্ধ উন্নয়ন পৰিষদে (এনডিডিবি) ৭ জানুৱাৰীত গুৱাহাটীৰ শ্ৰীমন্ত শংকৰদেৱ আন্তঃৰাষ্ট্ৰীয় প্ৰেক্ষাগৃহত ৰাজ্যখনত দুগ্ধ খণ্ডৰ সামগ্ৰিক বিকাশৰ বাবে এক যৌথ উদ্যোগ গঢ়ি তোলাৰ বাবে বুজাবুজিৰ চুক্তি স্বাক্ষৰ কৰে। অসমৰ মুখ্যমন্ত্ৰী ড০ হিমন্ত বিশ্ব শৰ্মা, কেন্দ্ৰীয় মীন পালন, পশুপালন আৰু দুগ্ধ পালন মন্ত্ৰী পুৰুষোত্তম ৰূপালাৰ লগতে অসম চৰকাৰৰ কৃষি, এএইচভিডি আৰু সহযোগিতাৰ মন্ত্ৰী অতুল বৰা আৰু ভাৰত চৰকাৰৰ পশুপালন বিভাগৰ সচিব অতুল চতুৰ্বেদীয়ে এই অনুষ্ঠানৰ গৰিমা বৃদ্ধি কৰে। এই বুজাবুজি চুক্তিত এনডিডিবিৰ অধ্যক্ষ মীনেশ শ্বাহ আৰু অসম চৰকাৰৰ সহযোগিতা বিভাগৰ অতিৰিক্ত মুখ্য সচিব মনিন্দৰ সিঙে স্বাক্ষৰ কৰে।
অনুষ্ঠানটোত অৰুণাচল প্ৰদেশৰ পশুপালন, পশু চিকিৎসা আৰু দুগ্ধ উৎপাদন মন্ত্ৰী টাগে' টাকি, আৰু মিজোৰামৰ পশুপালন আৰু পশু চিকিৎসা মন্ত্ৰী ড০ কে বেইচুৱাও উপস্থিত থাকে। অনুষ্ঠানটোত আন বহুতো জ্যেষ্ঠ চৰকাৰী গণ্যমান্য ব্যক্তি, বিষয়া, সংশ্লিষ্ট সংস্থা আৰু দুগ্ধ খেতিয়কো উপস্থিত থাকে। এই যুটীয়া উদ্যোগটোৰ উচ্চাভিলাষী লক্ষ্য হ'ব ৰাজ্যখনত প্ৰতিদিনে ১০ লাখ লিটাৰৰ অধিক গাখীৰ পৰিচালনা আৰু মূল্য যোগ কৰাৰ বাবে গাখীৰ প্ৰক্ৰিয়াকৰণ ক্ষমতা সৃষ্টি কৰা। এই পদক্ষেপে কেৱল ১.৭৫ লাখতকৈও অধিক কৃষকক তেওঁলোকৰ খেতিৰ উপাৰ্জন বৃদ্ধি কৰাতে সহায় নকৰে, ই লগতে দুগ্ধ মূল্য শৃংখলাৰ বিভিন্ন স্তৰত বৃহৎ নিযুক্তিও সৃষ্টি কৰিব। যুটীয়া উদ্যোগটোৱে সমগ্ৰ অসমত ছয়টা দুগ্ধ প্ৰক্ৰিয়াকৰণ প্ৰকল্প স্থাপনৰ বাবে দায়বদ্ধ হ'ব, য'ত ৪১০০ৰো অধিক দুগ্ধ সমবায় সমিতিৰ গাখীৰ সংসাধিত, পেক আৰু বিপণন কৰা হ'ব।
তদুপৰি, এই দুগ্ধ উন্নয়ন প্ৰকল্পৰ অংশ হিচাপে, অসমৰ দুগ্ধ খেতিয়কসকলক অধিক লাভ নিশ্চিত কৰিবলৈ অসমত ১৫০০০তকৈও অধিক উচ্চ দুগ্ধ উৎপাদনকাৰী গিৰ গাই অন্তৰ্ভুক্ত কৰা হ'ব। পৰিকল্পনাটোত অসমৰ ভিতৰত গৰুৰ খাদ্য আৰু চিলেজ নিৰ্মাণৰ বাবে আন্তঃগাঁথনি স্থাপনৰ পৰিকল্পনাও কৰা হৈছে।
ভাৰত চৰকাৰৰ সমৰ্থনত অসম চৰকাৰে বিভিন্ন চৰকাৰী আঁচনিৰ অধীনত সংশ্লিষ্ট বিভাগসমূহৰ জৰিয়তে এই যুটীয়া উদ্যোগৰ পৰিকল্পিত হস্তক্ষেপৰ বাবে বিত্তীয় সাহায্য আৰু সমৰ্থন নিশ্চিত কৰিব। এনডিডিবিৰ নিৰ্দেশনা, পৰামৰ্শ আৰু পৰিচালনাৰে এই যুটীয়া উদ্যোগটো চলিব, য'ত এনডিডিবিয়ে অসমলৈ যৌন-সজ্জিত বীৰ্য, ৰেচন সন্তুলন কাৰ্যসূচী, নৃতাত্ত্বিক পশু চিকিৎসা, সাৰ ব্যৱস্থাপনা প্ৰকল্প আদিৰ দৰে পৰীক্ষিত প্ৰযুক্তিগত উদ্ভাৱনও আনিব। যুটীয়া উদ্যোগটোৰ কাৰ্যকলাপ স্ব-বহনক্ষম হ'ব, য'ত প্ৰাৰম্ভিক আন্তঃগাঁথনিক সমবায় দুগ্ধ উৎপাদনৰ বিকাশৰ বাবে ৰাজ্য আৰু কেন্দ্ৰীয় চৰকাৰৰ বিভিন্ন আঁচনিৰ অধীনত আৰ্থিকভাৱে সহায় আৰু সমৰ্থন কৰা হ'ব। এই নতুন পদক্ষেপৰ ফলত স্থানীয় দুগ্ধ খেতিয়কসকলৰ লাভ বৃদ্ধি হ'ব, যি হৈছে প্ৰধানমন্ত্ৰী নৰেন্দ্ৰ মোদীয়ে কল্পনা কৰা "কৃষকৰ উপাৰ্জন দুগুণ কৰাৰ" লক্ষ্যৰ দিশত এক পদক্ষেপ।
অনুষ্ঠানটোত ভাষণ প্ৰদান কৰে অসমৰ মুখ্যমন্ত্ৰী ড০ হিমন্ত বিশ্ব শৰ্মা,কেন্দ্ৰীয় মীন পালন, পশুপালন আৰু দুগ্ধপালন মন্ত্ৰী পুৰুষোত্তম ৰূপলাই। এনডিডিবিয়ে ২০০৮ চনৰ পৰা পশ্চিম অসম গাখীৰ উৎপাদক সমবায় সংঘ লিমিটেড পৰিচালনা কৰি আহিছে আৰু বৰ্তমান ৱামুল এক সফল দুগ্ধ সমবায়ৰ এক অনুকৰণীয় আৰ্হি হিচাপে থিয় হৈ আছে। এক সমবায় সংস্থা হিচাপে ৱামুলে এনডিডিবিৰ পৰিচালনাত ইয়াৰ কাৰ্যকলাপ সলনি কৰিবলৈ সক্ষম হৈছে।ৱামুলৰ বৰ্তমানৰ ব্যৱস্থাপনা আৰু সফলতাই স্বচ্ছতা আৰু স্থিৰতাৰ গুৰুত্ব প্ৰদৰ্শন কৰিছে – গাখীৰ ক্ৰয়ৰ পৰা আৰম্ভ কৰি উৎপাদকৰ বেংক একাউণ্টলৈ পোনপটীয়া পৰিশোধ, আৰু বজাৰ স্থাপন আৰু সম্প্ৰসাৰিত কৰা, প্ৰত্যেক দিশতে ই প্ৰতিস্ফুত হৈছে। বিগত বছৰবোৰত ৱামুলে ইয়াৰ সন্মানীয় গ্ৰাহকসকলক মানদণ্ড-আধাৰিত মূল্য-সংযোজন সামগ্ৰী প্ৰদান কৰাৰ উপৰিও ইয়াৰ সৈতে সম্পৰ্কিত দুগ্ধ খেতিয়কসকলক সমগ্ৰ বছৰযুৰি লাভজনক বজাৰ নিশ্চিত কৰাত সক্ষম হৈছে। এই সকলোবোৰ কাৰকৰ বাবে, সংঘটোৱে ইয়াৰ পঞ্জীভুক্ত ব্ৰেণ্ড নাম 'পুৰবী'ৰ অধীনত প্ৰতিদিনে প্ৰায় ৭৩,০০০ লিটাৰ পেক কৰা তৰল গাখীৰ আৰু গাখীৰ সমতুল্য সামগ্ৰীৰ বিক্ৰী প্ৰাপ্ত কৰিবলৈ সক্ষম হয়।এই অনুষ্ঠানত অসমৰ মুখ্যমন্ত্ৰী ড০ হিমন্ত বিশ্ব শৰ্মা আৰু কেন্দ্ৰীয় মীন পালন, পশুপালন আৰু দুগ্ধ উৎপাদন মন্ত্ৰী পুৰুষোত্তম ৰূপালাই বিশ্ব বেংকৰ অনুদানপ্ৰাপ্ত অসম কৃষি ব্যৱসায় আৰু গ্ৰাম্য পৰিবহন প্ৰকল্পৰ (এপিএআৰটি) অধীনত পুৰবী দুগ্ধ সম্প্ৰসাৰণ প্ৰকল্পৰ আধাৰশিলাও উন্মোচন কৰে। সম্প্ৰসাৰণ প্ৰকল্পৰ অংশ হিচাপে, পুৰবী ডেইৰীৰ প্ৰক্ৰিয়াকৰণ ক্ষমতা প্ৰতিদিনে বৰ্তমানৰ ৬০,০০০ লিটাৰৰ পৰা প্ৰতিদিনে ১.৫ লাখ লিটাৰ গাখীৰলৈ উন্নীত কৰা হ'ব।
গুৱাহাটীৰ পাঞ্জাবাৰীত কাৰখানাৰ সম্প্ৰসাৰণে পুৰবী ডেইৰীক বৰ্তমানৰ সামগ্ৰীৰ উৎপাদন ক্ষমতা বৃদ্ধি কৰাৰ লগতে থলুৱা মিঠাই, আইচক্ৰীম, ফ্লেভাৰ্ড গাখীৰ আদিৰ দৰে নতুন সামগ্ৰী প্ৰৱৰ্তন কৰিবলৈ সক্ষম কৰিব।মধ্যাহ্ন ভোজনৰ পিছৰ অধিৱেশনত কেন্দ্ৰীয় মীন পালন, পশুপালন আৰু দুগ্ধপালন মন্ত্ৰী পুৰুষোত্তম ৰূপলাই উত্তৰ-পূবৰ বিভিন্ন ৰাজ্যৰ মন্ত্ৰী আৰু প্ৰতিনিধি, চৰকাৰী বিষয়া, উদ্যোগী আৰু কৃষকসকলৰ সৈতে এক মত বিনিময় অধিৱেশনত সভাপতিত্ব কৰে। এই অধিৱেশনৰ উদ্দেশ্য আছিল ভাৰত চৰকাৰৰ পশুপালন আৰু দুগ্ধ উৎপাদন বিভাগৰ সংশোধিত আৰু পুনৰ সংৰেখিত আঁচনিসমূহৰ লাভালাভৰ বিষয়ে সজাগতা সৃষ্টি কৰা আৰু অৱগত কৰা। ই কৃষকসকলক উন্নত জীৱিকা প্ৰদান আৰু উত্তৰ-পূব অঞ্চলৰ গ্ৰাম্য অৰ্থনীতি আৰু বিকাশক শক্তিশালী কৰাত সহায় কৰাৰ বাবে বিভিন্ন পথৰ ওপৰত আলোকপাত কৰে।
No comments:
Post a Comment