W7s news,গুৱাহাটী, ১৬ আগষ্ট: অসমৰ ভয়াৱহ বানপানীত ক্ষতিগ্ৰস্ত পৰিয়ালসমূহক সহায় কৰাৰ উদ্দেশ্যে আমিনগাঁৱত নিৰ্মাণাধীন ট্ৰিনিটি বিজনেছ পাৰ্কৰ তৰফৰ পৰা অসমৰ মুখ্যমন্ত্ৰীৰ সাহায্য পুঁজিলৈ ২১ লাখ টকা আগবঢ়োৱা হয়।
এইচ. কে. ছাগৰ ৰিয়েলটৰ্ছ এলএলপিৰ অংশীদাৰ ৰবি প্ৰকাশ আগৰৱালা আৰু হেমন্ত কুমাৰ আগৰৱালাই অসমৰ মুখ্যমন্ত্ৰী ড° হিমন্ত বিশ্ব শৰ্মাৰ হাতত ২১ লাখ টকাৰ চেক অৰ্পণ কৰে।
এই সহযোগিতাৰ বাবে মুখ্যমন্ত্ৰী ড° হিমন্ত বিশ্ব শৰ্মাই দুয়োগৰাকী অংশীদাৰক ধন্যবাদ জ্ঞাপন কৰাৰ লগতে বানপীড়িত পৰিয়ালসমূহৰ সহায়ৰ বাবে সংকটৰ সময়ত আগবাঢ়ি অহা তেওঁলোকৰ উদ্যোগক প্ৰশংসা কৰে।
এই উপলক্ষে ৰবি প্ৰকাশ আগৰৱালা আৰু হেমন্ত কুমাৰ আগৰৱালাই মুখ্যমন্ত্ৰীক ট্ৰিনিটি বিজনেছ পাৰ্ক প্ৰকল্পটোৰ বিষয়ে অৱগত কৰি কয় যে প্ৰকল্পটো সম্পূৰ্ণ হৈ উঠিলে অঞ্চলটোত বাণিজ্যিক কাৰ্যকলাপ বৃদ্ধি পোৱাৰ লগতে স্থানীয় ৰাজহ বৃদ্ধিতো ই গুৰুত্বপূৰ্ণ ভূমিকা পালন কৰিব বুলি আশা কৰা হৈছে। প্ৰকল্পটোৰ জৰিয়তে প্ৰত্যক্ষ আৰু পৰোক্ষভাৱে বৃহৎ সংখ্যক কৰ্মসংস্থাপনৰ সুযোগ সৃষ্টি হ’ব। ইয়াৰ ফলত স্থানীয় যুৱক-যুৱতীসকলে নতুন কৰ্মসংস্থাপন আৰু জীৱিকাৰ সুযোগ লাভ কৰিব।
প্ৰকল্পটোৰ বিষয়ে ৰবি প্ৰকাশ আগৰৱালাই কয়, “আজিৰ সময়ত ব্যৱসায়ীসকলৰ বাবে কেৱল এখন দোকান থকাটোৱেই যথেষ্ট নহয়; পৰ্যাপ্ত গাড়ী ৰখাৰ ব্যৱস্থা, সহজ যাতায়াত আৰু গ্ৰাহকৰ সুবিধাও সমানেই গুৰুত্বপূৰ্ণ। ফাঁচীবজাৰত গাড়ী ৰখা আৰু যাতায়াতৰ ক্ষেত্ৰত বৃদ্ধি পোৱা সমস্যাৰ প্ৰতি লক্ষ্য ৰাখি বহু ব্যৱসায়ীয়ে নিজৰ ব্যৱসায় অধিক সুসংগঠিত আৰু সুবিধাজনক স্থানলৈ সম্প্ৰসাৰণ বা স্থানান্তৰ কৰাৰ কথা চিন্তা কৰিছে। এই পৰিৱৰ্তিত প্ৰয়োজনীয়তাসমূহৰ প্ৰতি লক্ষ্য ৰাখিয়েই ট্ৰিনিটি বিজনেছ পাৰ্ক গঢ়ি তোলা হৈছে।”
হেমন্ত কুমাৰ আগৰৱালাই কয়, “ট্ৰিনিটি বিজনেছ পাৰ্কত ব্যৱসায়ীসকলৰ বাবে আধুনিক ব্যৱসায়িক পৰিৱেশৰ লগতে পৰ্যাপ্ত গাড়ী ৰখাৰ ব্যৱস্থা আৰু অন্যান্য প্ৰয়োজনীয় সুবিধা প্ৰদান কৰা হ’ব। আমাৰ উদ্দেশ্য হৈছে এনে এটা সুপৰিকল্পিত বাণিজ্যিক কেন্দ্ৰ গঢ়ি তোলা, য’ত ব্যৱসায়ীসকলে নিজৰ ব্যৱসায় সম্প্ৰসাৰণ কৰিব পাৰে আৰু গ্ৰাহকসকলেও অধিক সুবিধাজনকভাৱে বজাৰ কৰাৰ অভিজ্ঞতা লাভ কৰিব পাৰে। সময়ৰ পৰিৱৰ্তিত প্ৰয়োজনীয়তালৈ লক্ষ্য ৰাখি বস্ত্ৰ, মটৰ পাৰ্টছ আৰু হাৰ্ডৱেৰকে ধৰি বিভিন্ন খণ্ডৰ ব্যৱসায়ীসকলে এই প্ৰকল্পত দোকান আৰু কাৰ্যালয় গ্ৰহণৰ প্ৰতি আগ্ৰহ প্ৰকাশ কৰিছে।”
প্ৰায় ৩০ লাখ বৰ্গফুট নিৰ্মাণ ক্ষেত্ৰফলত গঢ়ি উঠিবলগীয়া এই প্ৰকল্পটোত প্ৰায় ৩,০০০খন গাড়ী ৰখাৰ সুবিধা আৰু প্ৰায় ১,৭৫০খন দোকান থকাৰ ব্যৱস্থা কৰা হৈছে। বস্ত্ৰ, মটৰ পাৰ্টছ, হাৰ্ডৱেৰকে ধৰি বিভিন্ন খণ্ডৰ ব্যৱসায়িক প্ৰতিষ্ঠানৰ বাবে ইয়াত দোকান আৰু কাৰ্যালয়ৰ সুবিধা থাকিব।
দুয়োগৰাকী অংশীদাৰে কয় যে মুখ্যমন্ত্ৰীৰ সাহায্য পুঁজিলৈ আগবঢ়োৱা ২১ লাখ টকাৰ এই সহযোগিতা তেওঁলোকৰ সামাজিক দায়বদ্ধতা আৰু সংকটৰ সময়ত অসমৰ জনসাধাৰণৰ কাষত থিয় দিয়াৰ প্ৰতিশ্ৰুতিৰ প্ৰতিফলন।
No comments:
Post a Comment