সাত মেচত অপৰাজেয় থাকি তৃতীয় স্থানলৈ উত্তৰণ নৰ্থ ইষ্ট ইউনাইটেড

 

নৰ্থ ইষ্ট ইউনাইটেড ঃ ৪ [গুইলেৰ্মো ১৭ মিনিট, আজাৰাই ৪৫ মিনিট, আখতাৰ ৭৯ মিনিট, বেমামাৰ ৮৯ মিনিট ]

হায়দৰাবাদ এফ চি ঃ ১ [মনোজ মহম্মদ ৭০ মিনিট]

গুৱাহাটী, ২৯ জানুৱাৰী ঃ নৰ্থ ইষ্ট ইউনাইটেড এফ চিয়ে চলিত একাদশ ইণ্ডিয়ান ছুপাৰ লীগ [আই এছ এল] ত ক্ৰমাগত সাতখন মেচত অপৰাজেয় যাত্ৰা অব্যাহত ৰাখি ১৮ খন মেচত ২৮ পইণ্টৰে তালিকাৰ তৃতীয় স্থানলৈ উত্তৰণ কৰিছে৷ বুধবাৰে গুৱাহাটীৰ ইন্দিৰা গান্ধী এথলেটিকছ ষ্টেডিয়ামত খেলা মেচত ঘৰুৱা দলটোৱে হায়দৰাবাদ এফ চিৰ বিৰুদ্ধে ৪-১ গলত জয়লাভ কৰে৷

নৰ্থ ইষ্ট ইউনাইটেডে এই জয়ৰে লীগৰ সঠিক সময়ত সফল প্ৰত্যাৱৰ্তন কৰিলে৷ উল্লেখ্য যে ছখন মেচত অপৰাজেয় হৈ আজি পুনৰ গৃহভূমিৰ খেলপথাৰত নমা নৰ্থ ইষ্ট ইউনাইটেডে যোৱা চাৰিখন মেচ ড্ৰ খেলিছিল৷ ইয়াৰে তিনিখন মেচ দলে গুৱাহাটীতে খেলিছিল৷ সেয়ে বিপক্ষ দুৰ্বল যদিও চাপ আছিল পেড্ৰ’ বেনালিৰ দল৷

কিন্তু খেলৰ প্ৰথমাৰ্ধতে দুটা গল কৰি প্ৰত্যাশিত আৰম্ভণি কৰে নৰ্থ ইষ্ট ইউনাইটেডে৷ ১৭ মিনিটত গুইলেৰ্মো ফাৰ্ণাণ্ডেজে প্ৰথমটো গল কৰাৰ পাছত ৪৫ মিনিটত আজাৰায়ে লীগত ১৬ নম্বৰ গলটো দি বিৰতিলৈ ঘৰুৱা দলক ২-০ ত আগুৱাই ৰাখে৷ প্ৰথম ৪৫ মিনিটৰ খেলত নৰ্থ ইষ্ট ইউনাইটেডে মেচ নিজৰ আয়ত্বতে ৰাখে৷

দ্বিতীয়াৰ্ধত হায়দৰাবাদে খেলুৱৈ সলনি কৰি আক্ৰমন কৰে আৰু সফলো হয়৷ ৭০ মিনিটত মনোজ মহম্মদে দলৰ হৈ একমাত্ৰ গলটো দিয়ে৷ পৰবৰ্তী ২০ মিনিট খেলত নৰ্থ ইষ্ট ইউনাইটেডে পুনৰ আক্ৰমনৰ ৰণনীতি লৈ দুটা গল কৰি চাৰিখন মেচৰ বিৰতিৰ পাছত তিনি পইণ্ট নিশ্চিত কৰিবলৈ সফল হয়৷

৭৯ মিনিটত আছিৰ আখতাৰে আৰু ৮৯ মিনিটত মহম্মদ আলী বেমামাৰে গল কৰি গুৱাহাটীৰ অন্তিম মেচত ঘৰুৱা সমৰ্থকক জয়ৰ অনাবিল সোৱাদ দিয়ে৷ ইয়াৰপূৰ্বে হায়দৰাবাদক ঘৰতে ৫-২ গ’লত পৰাস্ত কৰিছিল নৰ্থ ইষ্ট ইউনাইটেডে৷ 

এয়া নৰ্থ ইষ্ট ইউনাইটেডৰ ১৮ খন খেলত সপ্তম জয়৷ এইবাৰ দলে সাতখন ড্ৰ কৰিছে তথা চাৰিখনত পৰাস্ত হৈছে৷ আনহাতে,  নৰ্থ ইষ্ট ইউনাইটেডে আজি গুৱাহাটীত হায়দৰাবাদৰ বিৰুদ্ধে প্ৰথমটো লীগ ডাবল কৰাৰ গৌৰৱো অৰ্জন কৰিলে৷

ইফালে, জামছেদপুৰক পৰাস্ত কৰি গুৱাহাটীলৈ অহা হায়দৰাবাদ দলে যোৱা তিনিখন খেলত অপৰাজেয় হৈ আছিল যদিও পুনৰ নৰ্থ ইষ্ট ইউনাইটেডৰ সন্মুখত আত্মসমৰ্পন কৰিলে৷ হায়দৰাবাদে ১৮খন মেচত ১৩ পইণ্ট লাভ কৰি ১২ নম্বৰ স্থানত থাকিল৷ দলৰ জয়ৰ সংখ্যা তিনি, বিপৰীতে ১১ খনত পৰাজয় হৈছে৷

নৰ্থ ইষ্ট ইউনাইটেডে লীগৰ পৰৱৰ্তী মেচখন ওড়িছা এফ চিৰ বিৰুদ্ধে অহা তিনি ফেব্ৰুৱাৰীত ভূৱনেশ্বৰৰ কলিংগ ষ্টেডিয়ামত খেলিব৷ আনহাতে, হায়দৰাবাদ এফ চিয়ে অহা আঠ ফেব্ৰুৱাৰীত গৃহভূমি বালাযোগী ষ্টেডিয়ামত মহমেদান স্প’ৰ্টিঙৰ বিৰুদ্ধে পৰবৰ্তী মেচ খেলিব৷