এই ধৰ্মঘট অসমতো সফল কৰিবলৈ আহ্বান জনাইছে ট্ৰেড ইউনিয়ন আৰু কৰ্মচাৰী ফেডাৰেচনৰ অসম শাখাই
W7s news ষ্টাফৰিপোৰ্টাৰ:
কেন্দ্রীয় চৰকাৰৰ জনবিৰোধী নীতিৰ প্ৰতিবাদত আৰু শ্ৰমিক বিৰোধী শ্ৰম সংহিতা (কোড) বাতিল কৰা, বিদ্যুৎ (সংশোধনী) বিল-২০২১ বাতিল কৰা, ৰাজহুৱা খণ্ডক ব্যক্তিগতকৰণ বন্ধ কৰা, জাতীয় মুদ্ৰাকৰণ পাইপ লাইন বাতিল কৰা, আয়কৰৰ আওতাত নপৰা প্ৰতিগৰাকীক খাদ্য আৰু উপাৰ্জনৰ নিৰিখত মাহিলি ৭৫০০ টকা আদায় দিয়া, এম.এন. ৰেগাৰ পাৰিশ্ৰমিকৰ হাৰ বৃদ্ধি কৰা, শ্ৰমিকৰ ন্যূনতম মজুৰি দৈনিক ৮০০ টকা ধাৰ্য কৰি শীঘ্ৰে চৰকাৰী জাননী জাৰি কৰা ইত্যাদি দাবীত কেন্দ্ৰীয় ট্রেড ইউনিয়ন আৰু কৰ্মচাৰী ফেডাৰেচনসমূহৰ যৌগ মঞ্চই ২৮ আৰু ২৯ মার্চত দুদিনীয়া সাধাৰণ ধর্মঘটৰ আহ্বান জনাইছে। ট্রেড ইউনিয়ন আৰু কৰ্মচাৰী ফেডাৰেচনসমূহৰ অসম শাখাই এই ধৰ্মঘটৰ প্ৰতি সঁহাৰি জনাইছে। শুকুৰবাৰে গুৱাহাটী প্ৰেছ ক্লাৱত অনুষ্ঠিত
এখন সংবাদ মেলত চি আই টি ইউৰ উপ-সভাপতি বীৰেণ শৰ্মাই কয় - সাম্প্ৰতিক সময়ত কেন্দ্ৰীয় চৰকাৰখনে দেশৰ অৰ্থনীতি দুর্দশাগ্রস্ত কৰি তুলিছে। জনসাধাৰণৰ কৰৰ টকাৰে সৃষ্ট দেশৰ স্থাৱৰ-অস্থাৱৰ সকলো সম্পত্তি দ্বিধাহীনভাৱে পানীৰ দৰত বিক্ৰী কৰি দেশখনক ৰুগ্ন কৰি তুলিছে। শ্রমিক বিৰোধী, জনবিৰোধী আৰু কৃষক বিৰোধী নীতি গ্রহণ কৰি শ্রমজীৱী মানুহৰ বাবে অন্ধকাৰ নমাই আনিছে।”
চৰকাৰখনৰ এই জাতীয় স্বার্থ বিৰোধী নীতি সমূহৰ বিৰুদ্ধে শ্রমজীৱী মানুহৰ ঐক্যবদ্ধ সংগ্ৰামক তীব্ৰ কৰি তোলাৰ প্ৰয়োজন আহি পৰিছে। দেশী-বিদেশী কৰ্প’ৰেটৰ সহযোগিতাত একনায়কত্ববাদী পথেৰে গণতান্ত্রিক ব্যৱস্থাক চুৰমাৰ কৰি দিয়া কাৰ্যৰ বিৰুদ্ধে চলাই থকা সংগ্ৰামৰ অংশ হিচাপে এই ধর্মঘটৰ আহ্বান দিয়া হৈছে। চৰকাৰে গ্ৰহণ কৰা নীতিৰ ফলত ক'ভিদ পৰিস্থিতিতো যিসময়ত দেশৰ জনগণে আটাইতকৈ দুর্দশাৰ সম্মুখীন হৈছে সেই সময়ত আদানী-আম্বানী আদি ধনিক গোষ্ঠীয়ে তেওঁলোকৰ ব্যৱসায়ত সৰ্বাধিক লাভ অৰ্জন কৰিবলৈ সক্ষম হৈছে। চৰকাৰখনৰ নীতিৰ বাবে হোৱা অত্যাধিক মূল্যবৃদ্ধিৰ ফলতসৰ্বসাধাৰণ ৰাইজে নিত্যব্যৱহার্য সামগ্রী ক্রয় কৰাটো কঠিন হৈ পৰিছে।
২৩ কোটি শ্রমিকক চৰকাৰে ন্যুনতম দৰমহাতকৈও কম উপাৰ্জনেৰে চলিবলৈ এৰি দিছে বুলি অভিযোগ কৰিছে মঞ্চই। এফালে শ্ৰমিকৰ আৰ্জিত অধিকাৰ সমূহ খৰ্ব হৈছে আনফালে কৃষক তথা জনগণৰ অন্যান্য অংশৰ লোকৰ পানীত হাঁহনচৰা অৱস্থা হৈছে। কৃষকে কৃষিখণ্ড ৰক্ষাৰ স্বাৰ্থত সংগ্ৰাম কৰি আছে। অন্ন-বস্ত্ৰ-বাসস্থান-শিক্ষা-স্বাস্থ্য আদিৰ বাবে দেশৰ জনগণে জীয়াতু ভূগিবলগীয়া হৈছে। এনে পৰিস্থিতিৰ ফলত ক্ষুধাৰ সূচাংকত আমাৰ দেশ বিশ্বৰ ১০৭ বন দেশৰ ভিতৰত ১০১ সংখ্যক স্থানত অৱস্থান কৰিছে।
এই পটভূমিত এই ধর্মঘট শ্রমিক-কর্মচাৰীৰ অধিকাৰ ৰক্ষা কৰা, দেশীয় উদ্যোগ প্রতিষ্ঠান ৰক্ষা কৰা আৰু সর্বোপৰি দেশ ৰক্ষা কৰাৰ ধৰ্মঘট বুলি অভিহিত কৰিছে ট্ৰেড ইউনিয়নে। সেয়েহে ২৮-২৯ মাৰ্চত সকলো দোকান-পোহাৰ, যানবাহন, বানিজ্যিক প্রতিষ্ঠান, কল-কাৰখানা, ৰাজহুৱা খণ্ডৰ শিল্প প্রতিষ্ঠান, তৈলখণ্ড, বেংক, বীমা, ৰেল যাতায়ত বহু ৰাখি ধর্মঘট সর্বতো প্ৰকাৰে সফল কৰাৰ বাবে ট্রেড ইউনিয়ন আৰু কর্মচাৰী ফেডাবেচনসমূহে অসমৰ সৰ্বস্তৰৰ শ্ৰমিক-কর্মচাৰী আৰু ৰাইজলৈ আহ্বান জনাইছোঁ।' সংবাদ মেলত এ আই টি ইউ চিৰ ৰাজ্যিক সম্পাদক বীৰেন কলিতাই কয় - সিদিনা পুৱা ৬ বজাৰ পৰা ৩০ মাৰ্চলৈ পুৱা ৬ বজালৈ হ'ব লগীয়া ধৰ্মঘট আৰু চকা বন্ধলৈ আমি সঁহাৰি জনাইছোঁ আৰু অত্যাৱশ্যকীয় সেৱা সমূহক ইয়াৰ পৰা ৰেহাই দিয়া হ'ব।
উল্লেখ্য, যৌথ মঞ্চই উক্ত দিন কেইটাত পৰীক্ষা নথকা চৰকাৰী-বেচৰকাৰী সকলো শিক্ষা প্রতিষ্ঠান বন্ধ ৰাখিবলৈয়ো আবেদন জনায়। উল্লেখ্য, অসমত বিশেষকৈ ২৮ আৰু ২৯ মার্চত হ’ব লগা হাইস্কুল শিক্ষান্ত পৰীক্ষা আৰু উচ্চতৰ মাধ্যমিকৰ পৰীক্ষাৰ দিন সূচী সলনি কৰাৰ বাবে দুয়োখন বোৰ্ডৰ সচিবলৈ যৌথ মঞ্চই আবেদন জনাই পত্র প্রদান কৰে।
No comments:
Post a Comment